Jack Sargeant AS yn ymweld â Datblygiad Newydd o 100 o Dai Fforddiadwy yng Nglannau Dyfrdwy

Yr wythnos ddiwethaf, bu Jack Sargeant, Aelod Senedd Alun a Glannau Dyfrdwy, yn ymweld â Northern Gateway, datblygiad ClwydAlyn yng Nglannau Dyfrdwy, i weld sut mae’r preswylwyr wedi elwa ar y cartrefi newydd.

Adeiladwyd datblygiad diweddaraf ClwydAlyn, sy’n cynnwys 100 o dai newydd fforddiadwy, mewn partneriaeth â Chyngor Sir y Fflint a Llywodraeth Cymru. Cartrefi ‘am oes’ yw’r rhain sydd wedi’u dylunio fel bod modd eu haddasu wrth i anghenion y preswylwyr newid, ac maent hefyd yn cynnwys technoleg gynaliadwy i gadw’r costau rhedeg yn is.

Mae Mr Sargeant yn frwd iawn o blaid tai cymdeithasol. Fel brodor o ardal Cei Connah, roedd yn awyddus i ddysgu rhagor am ddatblygiad Northern Gateway, a sgwrsio â’r preswylwyr a thîm ClwydAlyn i ddarganfod sut bydd y cartrefi hyn yn ffurfio rhan o’u dyfodol.

Gyda phwyslais ar fynd i’r afael â chostau tanwydd sy’n codi a chreu cartrefi sy’n effeithlon o ran ynni, mae pob eiddo yn Northern Gateway yn cynnwys technolegau glanach a gwyrddach, a dyluniadau arloesol. Mae’r rhain yn cynnwys pympiau gwres ffynhonnell aer a phaneli trydan solar fydd yn golygu bod costau ynni a gwresogi’r cartrefi hyn yn llawer mwy fforddiadwy, ac mae’r manteision eisoes yn dod yn amlwg i’r preswylwyr.

“Mae’r ffaith fod ein cartref yn effeithlon o ran ynni yn golygu ei fod yn wych i’r amgylchedd ac o safbwynt ariannol bydd yn help mawr i ni.”

Gemma Powell

preswylwyr

Cafodd Mr Sargeant gyfle i gyfarfod Danielle a’i merch, sy’n awyddus i fagu ei theulu mewn cymuned sefydlog a chadarnhaol.

“Mae gen i dri o blant a doedden nhw ddim yn gallu chwarae tu allan yn ein hen gartref, ond maen nhw’n gallu gwneud hynny yma ac maen nhw wedi gwneud llawer o ffrindiau yn barod. Mae’r cymdogion yn hyfryd ac oherwydd y ffordd mae’r tai wedi cael eu hadeiladu, mae hi bob amser yn dawel iawn yma ac yn berffaith ar gyfer fy nheulu. Mae teimlad cymunedol cryf iawn yma yn barod.”

Danielle

preswylwyr

“Mae cael tai o’r fath mor bwysig. Mae’n rhoi’r sefydlogrwydd mae ei angen ar y preswylwyr.

“Mae cymuned yn bwysig. Mae cael cartref da a theimlad o gymuned mor bwysig er mwyn gwella rhagolygon pobl ac mae’n hanfodol i adeiladu’r economi.

“Rwy’n falch iawn o weld bod y preswylwyr wedi ymgartrefu mor dda ac rwy’n dymuno’r gorau iddyn nhw ar gyfer y dyfodol.”

Jack Sargeant

Aelod Senedd Alun a Glannau Dyfrdwy

“Roedd yn bleser croesawu Jack Sargeant i Northern Gateway. Roedd yn awyddus i weld y mesurau rydyn ni wedi’u rhoi yn eu lle i sicrhau y bydd y cartrefi hyn yn parhau i fod yn fforddiadwy. Roedd hefyd yn gyfle i ni ddangos y gwaith rydyn ni’n ei wneud gyda’n partneriaid technoleg i addysgu preswylwyr, gan gynnwys defnyddio paneli solar a phympiau gwres yn effeithlon, gan gadw biliau ynni mor isel â phosibl.”

Brinley Williams

Rheolwr Prosiectau Datblygu ClwydAlyn

Mae’r holl gartrefi yn natblygiad Northern Gateway ClwydAlyn bellach wedi cael eu dyrannu. I gael rhagor o wybodaeth am ddatblygiadau sydd ar waith ledled Gogledd Cymru, ewch i: Our Developments – Clwydalyn

01 - 04