Adroddiad Newydd yn datgelu Effaith Ymrwymiadau Amgylcheddol, Cymdeithasol a Llywodraeth Sefydliad Tai

Mae ClwydAlyn, y darparwr tai cymdeithasol, newydd gyhoeddi ei Adroddiad Amgylcheddol, Cymdeithasol a Llywodraethu (ACLl) newydd ar gyfer 2024-2025. Mae’r adroddiad, sy’n dangos tystiolaeth o lwyddiant y sefydliad, nawr ar gael i’w lawrlwytho.

Mae ClwydAlyn, sydd â’i bencadlys yn Llanelwy, yn darparu tua 6,800 o gartrefi diogel a chynnes ledled Gogledd a Chanolbarth Cymru. Mae adroddiad ACLl newydd y landlord cymdeithasol yn rhoi manylion am effaith barhaus ei waith, ac yn dangos tystiolaeth o effaith gadarnhaol y sefydliad ar unigolion, cymunedau, y gymdeithas a’r amgylchedd. Cyhoeddir yr adroddiad yn fuan ar ôl cyhoeddi cynllun corfforaethol pum mlynedd ClwydAlyn, sy’n amlinellu ei phrif weledigaeth; ‘Gyda’n gilydd byddwn yn rhoi diwedd ar dlodi’.

Fel rhan o’r adroddiad, dangosodd ClwydAlyn sut mae’r sefydliad yn mynd i’r afael â materion amgylcheddol a nodau cynaliadwyedd gan ddefnyddio mesurau fel gosod paneli solar, systemau gwresogi isgoch, paratoi ar gyfer peryglon hinsawdd, gwella mannau gwyrdd, defnyddio llai o ddŵr a rhoi sylw i sylweddau peryglus.

Mae’r adroddiad ACLl hefyd yn cadarnhau bod mynd i’r afael â fforddiadwyedd a diogelwch tai wedi bod yn allweddol bwysig i ClwydAlyn. Mae hyn yn cynnwys darparu cartrefi cynnes, diogel, blaenoriaethu ansawdd adeiladau, rhoi sylw i damprwydd, llwydni ac anwedd, rhoi cyfle i breswylwyr leisio eu barn a sicrhau eu bod yn fodlon, a gweithredu ar adborth preswylwyr.

YSTADEGAU A FFEITHIAU ALLWEDDOL O ADRODDIAD ACLl CLWYDALYN:

Yn ystod y cyfnod 12 mis dan sylw yn yr adroddiad, mae ClwydAlyn wedi:

Buddsoddi £4.5 miliwn i wella effeithlonrwydd ynni ei gartrefi
Croesawu 649 o breswylwyr newydd
Uwchraddio 387 o gartrefi i’w gwneud yn fwy effeithlon o ran ynni
Sicrhau bod 74% o’r defnyddiau a ddefnyddir o ffynonellau adnewyddadwy
Atal 97% o’i wastraff rhag mynd i safleoedd tirlenwi
Cwblhau 308 o gartrefi newydd
Cyfrannu gwerth dros £4,000 o fwyd i fanciau bwyd lleol

“Mae ein hadroddiad ACLl blynyddol yn gyfle i edrych yn fanylach ar y gwaith mae ClwydAlyn yn ei wneud i wella ein cymunedau. Mae’r adroddiad yn tynnu sylw at y blaenoriaethau cymdeithasol ac amgylcheddol allweddol rydym wedi’u rhoi ar waith.
“Mae’n bleser gennyf gyhoeddi adroddiad ACLl eleni a rhoi sylw i’r cynnydd rydym yn ei wneud tuag at ein gweledigaeth barhaus i fynd i’r afael â thlodi yn y rhanbarth.”

Clare Budden

Prif Weithredwr ClwydAlyn

Mae Adroddiad ACLl ClwydAlyn ar gael yn Gymraeg a Saesneg yn:

Cyhoeddiadau Allanol – Clwydalyn / Dogfennau – Clwydalyn