ClwydAlyn yn dewis AndysManClub yn Elusen y Flwyddyn!

Mae cydweithwyr y gymdeithas dai ClwydAlyn o Lanelwy wedi dewis yr elusen iechyd meddwl i ddynion, ANDYSMANCLUB, fel Elusen y Flwyddyn eleni, yn dilyn pleidlais ymhlith yr holl aelodau staff.

Cafodd yr elusen ei dewis o restr fer o achosion da a enwebwyd gan gydweithwyr, a daeth ANDYSMANCLUB i’r brig.

Bydd Pwyllgor Chwaraeon a Chymdeithasol ClwydAlyn (SAS) nawr yn trefnu calendr llawn o weithgareddau codi arian drwy gydol y flwyddyn, a fydd yn cynnwys twrnamaint pêl-droed, cystadleuaeth ddartiau, diwrnod golff elusennol, cwisiau, digwyddiadau noddedig a llawer mwy – er mwyn dod â chydweithwyr a’r gymuned leol ynghyd, a chodi ymwybyddiaeth ac arian hollbwysig i’r elusen.

Mae ANDYSMANCLUB yn elusen atal hunanladdiad yn y Deyrnas Unedig ac mae’n darparu grwpiau cymorth gan gyfoedion yn rhad ac am ddim i ddynion 18 oed a throsodd. Sefydlwyd yr elusen yn 2016 i roi diwedd ar y stigma ynghylch iechyd dynion ac mae’n annog dynion i siarad yn agored drwy sgwrsio a chreu cysylltiadau. Slogan yr elusen yw “Mae’n iawn i siarad”, ac mae’n cynnig cymorth i ddynion mewn amgylchedd cefnogol a diogel, heb unrhyw feirniadaeth.

Mae rhagor o wybodaeth ar gael yma:

“Rydyn ni wrth ein bodd i weld cynifer o gydweithwyr yn cymryd rhan yn y bleidlais i ddewis ‘Elusen y Flwyddyn’. Mae ANDYSMANCLUB yn gwneud gwaith hynod o bwysig wrth gefnogi dynion sy’n wynebu anawsterau a heriau, gan eu hatgoffa nad oes angen iddyn nhw wneud hynny ar eu pen eu hunain.
“Rydyn ni wedi trefnu rhaglen wych o fentrau codi arian, gan ddechrau gyda’n twrnamaint pêl-droed elusennol yng nghlwb pêl-droed Bae Colwyn, ddydd Sul, 26 Gorffennaf. Os hoffai unrhyw dimau lleol gymryd rhan, mae croeso iddyn nhw gysylltu â ni drwy e-bostio sportsandsocial@clwydalyn.co.uk i gael rhagor o wybodaeth!
“Ein nod yw codi cymaint o arian â phosibl i ANDYSMANCLUB, gan godi ymwybyddiaeth o’r cymorth sydd ar gael yn lleol ar yr un pryd.”

Annie Jackson

Cadeirydd Pwyllgor Chwaraeon a Chymdeithasol ClwydAlyn

"Hoffwn ddiolch o galon i bawb am gefnogi ein cenhadaeth. Mae eich caredigrwydd a’ch ymroddiad i’r hyn rydyn ni’n ei wneud yn golygu’r byd, nid yn unig i mi, ond i’r elusen a’r holl bobl y byddwch yn eu helpu.

“Mae ANDYSMANCLUB yn sefydliad codi arian yn bennaf, a’n nod yw cael gwared ar y stigma ynghylch iechyd meddwl dynion a gwneud yn siŵr na fydd unrhyw ddyn yn teimlo’n unig wrth ddelio â’i broblemau. Ond, er bod codi arian yn hollbwysig i gynnal ein gwaith, yr hyn sy’n creu newid mewn gwirionedd yw’r sgyrsiau, bod yn weledol, ac effaith donnog hyn o ran codi ymwybyddiaeth."

Luke Ambler

cydsylfaenydd ANDYSMANCLUB

I gysylltu ag ANDYSMANCLUB e-bostiwch: info@andysmanclub.co.uk

Neu i ddod o hyd i grŵp yn eich ardal, ewch i: Find A Support Group – ANDYSMANCLUB

Ar hyn o bryd, mae grwpiau’n cyfarfod yn lleol yn yr Wyddgrug, Glannau Dyfrdwy a Wrecsam am 7pm bob nos Lun, heblaw am wyliau banc.

Bydd Pwyllgor Chwaraeon a Chymdeithasol ClwydAlyn yn rhannu gwybodaeth a manylion digwyddiadau codi arian pan fyddant yn codi dros y misoedd nesaf, wrth i’r aelodau weithio gyda’i gilydd i godi arian i ANDYSMANCLUB a gwneud gwahaniaeth cadarnhaol er budd iechyd meddwl.