ClwydAlyn yn trosglwyddo’r Cartrefi olaf ym Maes y Llan yn Sir Ddinbych

Roedd y preswylwyr newydd wrth eu bodd yn symud i ddatblygiad newydd gwerth £11 miliwn ClwydAlyn ar Ffordd Rhuddlan, Bodelwyddan, yn ddiweddar.

Mae’r cartrefi olaf yn natblygiad newydd ClwydAlyn ym Modelwyddan, Sir Ddinbych, bellach wedi cael eu trosglwyddo i’r preswylwyr. Mae’r datblygiad o 33 o gartrefi yn cynnwys 4 fflat un ystafell wely, 12 fflat dwy ystafell wely, 3 tŷ dwy ystafell wely, ac 14 tŷ tair ystafell wely.

Mae’r datblygiad yn rhan o Gynllun Datblygu Lleol (CDLl) Cyngor Sir Ddinbych, ac mae pob cartref yn cynnig y safonau uchaf o ran effeithlonrwydd gan olygu y bydd y biliau ynni yn is.

33 o Gartrefi Fforddiadwy yn Sir Ddinbych

Dywedodd Penny Storr, Pennaeth Datblygiad a Thwf ClwydAlyn: “Rydyn ni’n falch iawn o groesawu’r 24 teulu olaf i’r datblygiad tai newydd.

“Rydyn ni’n wedi ymroi i wella bywydau ein preswylwyr drwy leihau biliau ynni, darparu cartrefi cynnes a rhoi cymorth i sicrhau bod pawb yn cael y canlyniadau iechyd a llesiant gorau.

“Mae’r cartrefi newydd hyn nid yn unig yn cyrraedd ein targedau amgylcheddol newydd, maen nhw hefyd yn gartrefi fforddiadwy a braf lle gall pobl ffynnu.”

Adeiladwyd pob cartref ym Maes y Llan gan ddefnyddio Dulliau Adeiladu Modern. Mae deunydd inswleiddio o ansawdd uchel yn cadw’r cartrefi yn gynnes yn y gaeaf ac yn oer yn yr haf. Mae pympiau gwres ffynhonnell aer yn darparu’r gwres a dŵr cynnes. Ac i wneud y cartrefi mor effeithlon â phosibl o ran ynni, mae’r paneli trydan solar wedi’u gosod i wneud y mwyaf o ynni’r haul.

Beth yw barn y Preswylwyr newydd?

Symudodd Khadijah Hampton i’r datblygiad gyda’i phartner a’i dau blentyn.

"Ein hargraff gyntaf yw bod y tu mewn i’r fflat newydd yn hyfryd. Mae popeth mor fodern ac rydyn ni wrth ein bodd gyda’r gegin newydd. Mae cloeon ar sawl cwpwrdd, felly mae’n fwy diogel i storio cemegion o afael y plant.
“Rydyn ni’n teimlo’n ddiogel yma oherwydd y camerâu diogelwch ac mae drws ffrynt y fflatiau yn ddiogel hefyd.
“O’r diwedd, byddwn yn gallu ymgartrefu yma fel teulu, ac rydyn ni’n edrych ymlaen i’n dyfodol yma.”

Khadijah Hampton

Preswyliwr

"Rydyn ni’n hapus dros ben i fod yma.
“Mae digon o le yn y fflat; bydd yn addas iawn i ni a’n merch fach.”

Chloe and Aaron Davies

preswylwyr

“Mae ein cartref yn fodern iawn ac yn cynnwys y nodweddion diweddaraf, ac rydw i’n gwybod y bydd y ferch a finnau yn ddiogel iawn yma. Mae’n llawer gwell na’r hen gartref.
“Y peth gorau i mi yw’r ardal; mae’n atyniad mawr gan fod mam a’m modryb yn gweithio yn yr ysbyty yr ochr arall i’r ffordd, byddan nhw’n gallu galw draw am baned!”

Andy Murray

Preswyliwr

Dywedodd Heidi McDougall, Pennaeth Tai a Chymunedau Cyngor Sir Ddinbych: “Rydyn ni’n falch iawn bod y gwaith o godi’r cartrefi newydd ynni-effeithlon ym Modelwyddan wedi’i gwblhau. Cafodd y cynllun ei ddarparu mewn partneriaeth â ClwydAlyn a Llywodraeth Cymru. Mae’r datblygiad yn cyfrannu at flaenoriaeth gorfforaethol y Cyngor i weithio mewn partneriaeth a darparu rhagor o dai fforddiadwy i breswylwyr, gan helpu pobl leol i gael cartrefi diogel a modern yn eu cymunedau, yn ogystal â chwarae rôl allweddol i gryfhau cymunedau ledled Sir Ddinbych.”

Darparwyd y datblygiad tai gan y darparwr tai cymdeithasol ClwydAlyn mewn partneriaeth â’r contractwr uchel ei barch K&C Construction a gyda chyfraniad ariannol gan Gyngor Sir Ddinbych a Llywodraeth Cymru. Mae pob cartref yn bodloni ac yn rhagori ar Safon Ansawdd Tai Llywodraeth Cymru (SATC), Gofynion Ansawdd Datblygu Llywodraeth Cymru a Safonau Mannau a Chartrefi Prydferth Llywodraeth Cymru.

I gael rhagor o wybodaeth am ddatblygiadau arfaethedig ClwydAlyn ledled Gogledd a Chanolbarth Cymru, ewch i: www.clwydalyn.co.uk/developments

I gael rhagor o fanylion am ddatblygiad Maes y Llan, ewch i: Maes y Llan, Ffordd Rhuddlan – Clwydalyn