Dathlu Cymunedau: Pedair Cymdeithas Dai Leol yn arddangos gyda’i gilydd yn Eisteddfod 2025

Mae pedair cymdeithas dai – Adra, ClwydAlyn, Grŵp Cynefin a Tai Gogledd Cymru – wedi dod ynghyd i arddangos yn yr Eisteddfod eleni, a gynhelir rhwng 2 a 9 Awst yn Wrecsam.

Yr Eisteddfod yw’r dathliad mwyaf o ddiwylliant Cymru ac mae’n gyfle i ddod â chymunedau o bob rhan o Gymru at ei gilydd i ddathlu’r iaith Gymraeg, y celfyddydau, cerddoriaeth, a llawer mwy. Mae’r Eisteddfod flynyddol yn ddigwyddiad pwysig yng nghalendar llawer o bobl; cyfle i ymuno â ffrindiau, teuluoedd a chymunedau a chanolbwyntio ar y Gymraeg a’i threftadaeth.

Roedd y pedair cymdeithas dai yng ngogledd Cymru, sy’n rheoli ac yn berchen ar dros 20,000 eiddo ledled Gogledd a Chanobarth Cymru, yn awyddus i fod yn rhan o’r dathliad, a’r cyfle i roi sylw i’r hyn sydd wrth galon eu cymdeithasau: cymuned. Bydd Adra, ClwydAlyn, Grŵp Cynefin a Tai Gogledd Cymru yn estyn croeso cynnes i ymwelwyr drwy gydol Eisteddfod 2025, ac yn cydnabod rolau hanfodol cymdeithasau tai; sef cynnig cartrefi diogel a chynnes i breswylwyr a darparu pob math o wasanaethau cymorth i’r bobl mae arnynt eu hangen.

Bydd y sefydliadau yn canolbwyntio ar themâu gwahanol bob diwrnod i ddangos pa mor werthfawr yw ‘cymuned’ ac yn defnyddio eu llwyfannau unigol i ddod ag ymwelwyr a phreswylwyr ynghyd i fwynhau’r dathliadau ac ystyried ystyr ‘cartref’.

Gall ymwelwyr â’r stondin fwynhau cerddoriaeth fyw gan Band Bwced, gweithgareddau i bob oedran, paentio wyneb a gêm gyffrous ‘Cyclone’, yn ogystal â dyddiau arbennig ar y themâu canlynol:

Dydd Llun 4 Awst – Iechyd a Llesiant
Dydd Mawrth 5 Awst – Diwrnod Arweinyddiaeth
Dydd Mercher 6 Awst – Diwrnod Gwyrdd
Dydd Iau 7 Awst – Diwrnod Tai Fforddiadwy
Dydd Gwener 8 Awst – Diwrnod Cyfleoedd Recriwtio

Cynhelir sgyrsiau panel gyda siaradwyr o bob un o’r cymdeithasau tai ddydd Mawrth a dydd Iau am 11:00am ym Mhabell y Cymdeithasau.

Ledled Cymru, mae cymdeithasau tai yn darparu dros 173,000 o gartrefi i 300,000 a mwy o bobl, sef un o bob 10 o bobl ym mhob rhanbarth[1]. Maent yn rhedeg ac yn berchen ar gartrefi o bob math a phob deiliadaeth, gan gynnwys tai cymdeithasol fforddiadwy i deuluoedd ac aelwydydd sengl, yn ogystal â gwasanaethau nyrsio a gofal arbenigol, dewisiadau byw’n annibynnol a byw â chymorth, perchnogaeth cost isel, gwasanaethau rheoli prydlesau, tai canolraddol a rhent y farchnad.

[1] Cartrefi Cymunedol Cymru, Ebrill 2024: LGHC inquiry into social housing supply: CHC response

“Rydym yn edrych ymlaen at ddod ynghyd â’n cydweithwyr o Adra, Grŵp Cynefin a Tai Gogledd Cymru i ddathlu ein cymunedau. Nod pob un ohonom yw sicrhau bod cymorth ar gael i bob un o’n preswylwyr a gweithio tuag at Gymru lle mae gan bawb gartref, ac rydym yn falch iawn o’r cyfle i hyrwyddo ein blaenoriaethau yn Eisteddfod 2025.”

Clare Budden

Prif Swyddog Gweithredol, ClwydAlyn

“Gan fod yr Eisteddfod yn cael ei chynnal yng ngogledd Cymru eleni, rydym wedi ymuno â’r tair gymdeithas dai arall i ddangos gwaith ein sefydliadau ar draws y rhanbarth. Mae’n gyfle gwych i ddathlu ein heffaith gadarnhaol ar ein cymunedau a thynnu sylw at bwysigrwydd darparu rhagor o dai fforddiadwy i bobl leol, a dyma’r amser perffaith i ddiolch i bawb sydd wedi gweithio gyda ni ac sydd wedi ein cefnogi dros y blynyddoedd."

Iwan Trefor Jones

Prif Weithredwr, Adra

“Mae’r Eisteddfod yn ddathliad gwych o ddiwylliant, hunaniaeth, a chymuned Cymru – gwerthoedd sy’n ganolog i’n gwaith yn Tai Gogledd Cymru. Rydym yn falch o fod yn rhan o’r digwyddiad eleni gydag Adra, Clwyd Alyn a Grŵp Cynefin, a chael cyfle i ddangos rôl bwysig y cymdeithasau tai wrth gefnogi pobl a lleoedd ledled Gogledd Cymru. Mae’n gyfle gwych i gysylltu â phreswylwyr lleol a gwrando arnynt.”

Helena Kirk

Prif Weithredwr, North Wales Housing Association

“Rydyn ni yn Grŵp Cynefin yn hynod falch o fod yn rhan o Eisteddfod Genedlaethol Wrecsam eleni. Mae rhannu stondin gyda’n partneriaid yn y sector tai yn enghraifft gadarn o gydweithio, rhannu adnoddau, a sicrhau gwerth gwirioneddol am arian. “Bydd yr Eisteddfod yn gyfle unigryw i ysbrydoli trafodaethau pwysig am ddyfodol tai cymdeithasol yng Nghymru - sut y gallwn ni barhau i gefnogi cymunedau Cymreig, ac adeiladu cartrefi a chysylltiadau sy’n sicrhau ffyniant unigolion a chymunedau. Rydw i’n edrych ymlaen i’r drafodaeth, a’r ŵyl. "

Mel Evans

Prif Weithredwr, Grŵp Cynefin

I gael rhagor o wybodaeth am Eisteddfod eleni, ewch i: Croeso | Eisteddfod

I ymweld â stondin Adra, ClwydAlyn, Grŵp Cynefin a Tai Gogledd Cymru, ewch i: 621-624.

I gael manylion am y sgyrsiau panel ym Mhabell y Cymdeithasau, ewch i: Rhaglen | Eisteddfod