Gosod y Safon ar gyfer
Cartrefi Diogel, Cynnes a Chysurus

Mae’r SATC newydd yn gosod y safonau ar gyfer pob cartref gan sicrhau eu bod yn ddiogel, yn gadarn, yn effeithlon o ran ynni ac wedi’u hadeiladu ar gyfer y dyfodol. Mae’n golygu sicrhau bod eich cartref yn cefnogi eich iechyd, hapusrwydd a’ch llesiant.

Er mwyn i ni fodloni safonau LlC:

• Dylai eich cartref fod yn gadarn yn strwythurol.
• Rhaid iddo fod mewn cyflwr da, ni ddylai fod yn wan nac yn dadfeilio.
• Rhaid i’ch cartref fod yn rhydd rhag lleithder.
• Dylai grisiau fod yn ddiogel.

Dylai eich cartref fod yn saff ac yn ddiogel

• Mae teimlo’n ddiogel yn dechrau yn y cartref. Dyna pam bydd eich drysau a’ch ffenestri yn gadarn ac yn ddiogel, gan ddilyn canllawiau ‘Secured By Design’ yr heddlu.
• Mae diogelwch tân yn flaenoriaeth hefyd, rhaid i’ch cartref gael synwyryddion gwres a mwg, a llwybr dianc diogel a hawdd os bydd argyfwng.
• Yn achos cartrefi sy’n defnyddio nwy, olew, neu danwydd solet, byddwn yn cynnal archwiliadau diogelwch blynyddol i’ch cadw yn ddiogel. Byddwn yn cynnal archwiliadau diogelwch trydanol bob pum mlynedd, ac yn rhoi copïau i chi.

Dylai eich cartref fod yn gynnes, yn fforddiadwy i’w wresogi a chael yr effaith leiaf bosibl ar yr amgylchedd:

• Dylai cartref cyfforddus deimlo’n gynnes ac yn groesawgar, ond mae angen iddo fod yn fforddiadwy i’w wresogi hefyd. Dyna pam ein bod yn gwneud pob cartref mor effeithlon o ran ynni â phosibl.
• Bydd eich cartref wedi’i awyru’n gywir, yn enwedig mewn ceginau ac ystafelloedd ymolchi, i gadw’r aer yn ffres ac yn iach. Bydd gosodiadau a dyfeisiau arbed dŵr hefyd yn helpu i leihau eich biliau ac o fudd i’r amgylchedd.

Dylai eich cegin a’ch ystafell ymolchi fod yn fodern ac yn ymarferol

• Dylai eich cegin a’ch ystafell ymolchi fod yn fodern ac yn ymarferol, a bod yn addas ar gyfer eich dibenion bob dydd. Mae hynny’n golygu y gosodiadau diweddaraf, lloriau sy’n atal llithro, a digon o le ar gyfer eich teclynnau hanfodol.
• Dylai ceginau gael lle ar gyfer ffwrn, oergell, a pheiriant golchi, a dylai ystafelloedd ymolchi gynnwys cawod, a bath os yw’n bosibl.
• Os nad oes ardal ar gyfer golchi, sychu a chrasu dillad, dylem ddarparu peiriant sychu dillad.

Dylai eich cartref fod yn gysurus a dylai fodloni eich anghenion

• Mae’n bwysig eich bod yn gysurus. Dyna pam dylai fod digon o le yn eich cartref gyda gorchuddion llawr o ansawdd da, gan roi teimlad cynnes a chroesawgar.
• Dylid lleihau sŵn cymaint â phosibl, a dylai waliau a ffenestri o ansawdd da helpu i leihau unrhyw broblemau. Rydym hefyd yn sicrhau bod cartrefi yn addas i breswylwyr hŷn a phobl ag anableddau.

Dylai ardaloedd awyr agored fod yn hygyrch a chael eu cynnal yn dda

• Yn ogystal â bod yn ddeniadol, mae ardaloedd awyr agored yn bwysig i’ch llesiant hefyd. Dyna pam rydym yn sicrhau bod gan gartrefi fynediad at ardaloedd awyr agored diogel, ymarferol, sy’n cael eu cynnal yn dda, ac sy’n hybu teimlad o gymuned.
• Lle bo’n bosibl, bydd gan gartrefi lwybrau diogel, hygyrch a mannau i storio beiciau neu offer garddio. Bydd ardaloedd awyr agored cyffredin yn cael eu dylunio i fod yn groesawgar ac yn hawdd eu cynnal, gyda digonedd o wyrddni sy’n gadael i olau’r haul dreiddio drwyddo.

Dyma’r prif derfynau amser byddwn yn gweithio tuag atyn nhw:

31 Mawrth 2025:

• Asesu cyflwr cartrefi fel ein bod yn gwybod pa waith mae angen ei wneud.
• Creu cynllun ac amcangyfrifo cost gwelliannau i gyrraedd y safonau.
• Ymgysylltu â phreswylwyr i sicrhau bod eich barn yn cael ei chynnwys yn y broses. Byddwn hefyd yn rhoi eich adborth i LlC.

31 Mawrth 2027:

• Rhaid i bob cartref fodloni safonau SATC.

Mae gwrando ar breswylwyr, a chydweithio â nhw, yn hanfodol i’n helpu i gyrraedd y safon a siapio ein gwasanaethau. Byddwn yn gweithio’n agos gyda’n grŵp Dylanwadwch.

Os hoffech ymuno â Dylanwadwch, anfonwch e-bost atom:

InfluenceUs@ClwydAlyn.co.uk