Chwa o Awyr Iach: Ystafell Llesiant Newydd yn yr Awyr Agored i Breswylwyr Cartref Gofal yn Rhuthun!
Mae ystafell llesiant awyr agored newydd wedi cael ei chreu yng Nghartref Gofal Llys Marchan, Rhuthun, i wella iechyd meddwl a chorfforol preswylwyr a staff a chynnig man tawel a chreadigol i ymlacio, myfyrio a chysylltu ag eraill.
Datblygwyd y syniad ar gyfer yr ystafell gan y rheolwr Paula Heath a’r Uwch Ymarferydd Gofal Dydd Lesley Breeze-Axon. Roedd y ddwy yn awyddus i greu llecyn tawel yn yr awyr agored lle gallai preswylwyr ymgilio o’r drefn ddyddiol arferol a mwynhau llonyddwch a thawelwch byd natur.
Mae ymchwil yn dangos y gall treulio amser ym myd natur leihau straen a gorbryder yn sylweddol, a chodi’r hwyliau. Y darparwr tai cymdeithasol ClwydAlyn yw perchennog a rheolwr Llys Marchan, sy’n cynnig 10 o leoedd cofrestredig ar gyfer oedolion y mae angen gofal preswylwyr arnynt ar gyfer salwch meddwl. Bydd pob preswyliwr yn cael cyfle i elwa ar ddefnyddio’r ystafell llesiant awyr agored.
Gyda chymorth staff, tîm DIY SAS ClwydAlyn, pedwar o breswylwyr a gweithiwr y safle Kevin Marchin, cafodd yr adeilad gardd metel ei drawsnewid gan ddefnyddio cadeiriau cyfforddus, clustogau meddal, a phlanhigion. Gosodwyd drychau i adlewyrchu’r golau yn ogystal â phlanhigion gwyrdd crog ac mae’r tîm hyd yn oed wedi cynnwys bwrdd coffi, goleuadau solar ac uned storio. Y lle delfrydol i eistedd yn gyfforddus gyda phaned o de a chael seibiant.
“Diolch yn fawr iawn i bawb sydd wedi cyfrannu, gan gynnwys y preswylwyr, Lisa a Hien o DIY SAS, a chwaraeodd ran allweddol wrth drefnu’r prosiect; Lesley, sydd bob amser yn rhoi buddiannau’r preswylwyr yn gyntaf; a’n holl staff gwych a ddaeth draw i helpu.
“Cyn gynted ag y gwnaethon ni osod y glustog olaf ar y soffa, daeth un o’n preswylwyr draw i ddefnyddio’r ystafell yn syth. Roedd yn brofiad arbennig iawn i weld hyn ac fe wnaeth ein hatgoffa pa mor bwysig yw mentrau o’r fath, sy’n golygu cymaint i aelodau cymuned Llys Marchan.”
“Mae defnyddio’r ystafell llesiant awyr agored newydd yn ffordd arall o annog ein preswylwyr i flaenoriaethu eu llesiant meddyliol a hybu eu taith tuag at well iechyd meddwl.”
Mae Llys Marchan yn derbyn atgyfeiriadau newydd o ardal yr awdurdod lleol a thu hwnt ar hyn o bryd. I gael rhagor o wybodaeth am y cynllun neu i drefnu ymgynghoriad, ewch i: Llys Marchan – Clwydalyn
