Seremoni Torri’r Dywarchen yn nodi dechrau’r gwaith o adeiladu Tai Fforddiadwy newydd yng Nghaergybi

Fe wnaeth y darparwr tai cymdeithasol ClwydAlyn groesawu AS Plaid Cymru Ynys Môn, Llinos Medi, a Chynghorydd Sir Ynys Môn Robin Wyn Williams i seremoni torri’r dywarchen ar ddatblygiad newydd o 54 o gartrefi newydd o ansawdd uchel, effeithlon o ran ynni, yng Nghae Bothan, Ynys Môn.

Gan fod prinder mawr o dai fforddiadwy i’w rhentu, croesawyd y newyddion y bydd ClwydAlyn, mewn partneriaeth â Chyngor Sir Ynys Môn a Llywodraeth Cymru, yn adeiladu 54 o gartrefi ar gyrion tref borthladd brysur Caergybi.

Bydd y datblygiad yn cynnwys 20 fflat 1 ystafell wely gyda mynediad personol, 10 tŷ 2 ystafell wely, 12 tŷ 3 ystafell wely, 6 tŷ 4 ystafell wely, 4 bynaglo 2 ystafell wely a dau fyngalo sydd wedi’u haddasu ar gyfer cadeiriau olwyn. Bydd pob eiddo yn cynnwys pympiau gwres ffynhonnell aer, paneli trydan solar, a byddant yn cael eu lleoli i wneud y gorau o wres yr haul a golau naturiol.

Bydd ‘Dulliau Adeiladu Modern’ yn sicrhau bod y broses adeiladu yn defnyddio cynifer o ddefnyddiau naturiol a chynaliadwy â phosibl a gaiff eu darparu gan wneuthurwyr a chyflenwyr lleol gan leihau’r ôl-troed carbon.

Mae’r datblygiad gwerth £10.2 miliwn yn cael ei adeiladu ar ran ClwydAlyn gan y contractwr lleol o Ogledd Cymru K&C Construction, ac mae wedi’i ariannu’n rhannol gan Lywodraeth Cymru, Grant Tai Cymdeithasol.

“Cartrefi fforddiadwy o ansawdd yw sylfaen bywyd pobl. Rydyn ni’n gobeithio y bydd y cartrefi saff, cynnes ac effeithlon o ran ynni yn gwella iechyd a lles teuluoedd a phobl leol.
“Rydyn ni’n falch iawn o weld y gwaith yn dechrau yn natblygiad Cae Bothan, ac rydyn ni’n rhagweld y bydd y 54 o gartrefi modern o ansawdd uchel wedi’u cwblhau erbyn y gwanwyn 2027.”

Helen Williams

Rheolwr Prosiectau Datblygu, ClwydAlyn

“Mae prinder tai a’r nifer cynyddol o bobl sy’n wynebu digartrefedd ar yr ynys yn broblem ddifrifol. Bydd y cartrefi hyn yn cynnig cartrefi y mae galw mawr amdanyn nhw.”

Llinos Medi

AS Plaid Cymru Ynys Môn

“Mae’r prosiect tai hwn i godi 54 o gartrefi newydd fforddiadwy yng Nghaergybi yn rhan o ymrwymiad Cyngor Sir Ynys Môn i ddiwallu’r angen lleol am dai a helpu pobl leol i fyw mewn tai fforddiadwy o ansawdd yn eu cymunedau eu hunain."
"Ein nod yn y tymor hir yw gweithio mewn partneriaeth â’n darparwyr Tai Cymdeithasol Cofrestredig i ddarparu cannoedd o dai newydd fforddiadwy o ansawdd ar yr ynys."

Robin Wyn Williams

Cynghorydd - Ynys Môn

“Mae K&C Construction yn falch iawn o ddarparu’r prosiect hwn ar ran Clwyd Alyn, a chyfrannu at gynllun tai fforddiadwy pwysig arall y mae galw mawr amdano fel rhan o’n partneriaeth tymor hir. Mae’r datblygiad hwn yn ganlyniad cydweithio agos â rhanddeiliaid allweddol i fynd i’r afael ag anghenion tai lleol, gan amddiffyn a gwella’r amgylchedd lleol mewn lleoliad mor hyfryd ar yr un pryd. Rydym wedi ymrwymo i greu cymunedau cynaliadwy sydd o fudd i breswylwyr a’r ardal ehangach.”

Carl Roberts

Rheolwr-Gyfarwyddwr K&C Construction

I gael rhagor o wybodaeth, ewch i: Tai ClwydAlyn Gogledd Cymru

01 - 04