77 o Gartrefi Newydd yn dod â Chyfleoedd i Builder Street, Llandudno
Mae pennod newydd yn dechrau yn Llandudno wrth i ClwydAlyn gadarnhau bod 21 o’r 77 o gartrefi newydd yn Builder Street yn barod i gael eu trosglwyddo i breswylwyr lleol; dyma’r nifer mwyaf o dai newydd i gael eu codi yng nghanol y dref ers sawl blwyddyn.
I’r bobl a fydd yn symud i fyw yma, mae’r tai hyn yn golygu llawer mwy na brics a mortar. Byddant yn cynnig cartref diogel, cynnes a fforddiadwy, ac yn creu sylfeini cadarn er mwyn i bobl adeiladu eu bywydau ac edrych ymlaen i’r dyfodol yn hyderus.
Mae’r cartrefi newydd hyn, a ddarperir gan ClwydAlyn mewn partneriaeth â Chyngor Bwrdeistref Sirol Conwy, K&C Construction a Llywodraeth Cymru, yn cynnig tai fforddiadwy y mae galw mawr amdanynt, ac i lawer o breswylwyr bydd y gyfle i gael dechrau newydd.
Mae byw yng nghanol y dref yn gallu golygu bod yn fwy agos at waith, addysg, siopau, trafnidiaeth gyhoeddus, teulu, ffrindiau a chyfleusterau cymunedol. Bydd y datblygiad hwn yn darparu 100% o gartrefi fforddiadwy i bobl leol, mewn ardal lle mae arbenigwyr annibynnol wedi nodi bod prinder ohonynt.
Yn ystod y bore agored, bu cynghorwyr lleol, arweinwyr Cyngor Bwrdeistref Sirol Conwy a Maer Llandudno yn ymweld â’r safle a’r cartrefi newydd, gan weld y cynnydd a wnaed ar y safle a chyfarfod tîm datblygu ClwydAlyn.
Dathlu Arwr Rhyfel Lleol
Mae un o’r ffyrdd ar y datblygiad newydd, Clos Glyn Griffiths, wedi cael ei henwi ar ôl sarsiant a pheilot ifanc, ac arwr yr Ail Ryfel Byd, sef Glyn Griffiths o Landudno. Pan oedd yn 24 oed cyflwynwyd y Fedal Nodedig am Hedfan iddo i gydnabod ei wasanaeth dewr yn hedfan awyrennau Hawker Hurricanes yn Sgwadron rhif 17 yn ystod Brwydr Prydain yn 1940. Y Cynghorydd Angela O’ Grady awgrymodd y dylid enwi’r stryd ar ei ôl.
Dywedodd y Cynghorydd O’Grady: “Roedd yn braf iawn gweld y Sarsiant Glyn Griffiths yn cael ei gofio ar un o’r arwyddion ffordd. Doeddwn i ddim yn meddwl y byddai hyn yn digwydd ac mae’n beth arbennig iawn gallu cerdded heibio’r arwydd bron iawn bob dydd gan wybod y bydd yr aelod ifanc hwn o’r lluoedd arfau yn cael ei gofio am byth yn ei dref enedigol.”
Cartrefi i Breswylwyr Lleol
Dywedodd Penny Storr, Pennaeth Datblygu a Thwf ClwydAlyn
Bydd gan breswylwyr newydd Builder Street eu cartrefi eu hunain ac yn gallu bwrw gwreiddiau yn y gymuned. Mae’r datblygiad yn arwyddocaol gan ei fod yn darparu tai fforddiadwy y mae galw mawr amdanynt, yn ogystal â chynnig cyfleoedd cyffrous i’r dref.
Bydd teuluoedd yn dechrau symud i’r tai yn ystod y mis, ac mae disgwyl i’r fflatiau gael eu cwblhau ym mis Medi. Rydyn ni’n dymuno’r gorau i holl breswylwyr newydd Builder Street yn eu cartrefi newydd!”
Mae 56 o fflatiau ar y safle ac, ar ôl eu cwblhau, bydd 24 o’r rhain yn cael eu dynodi i bobl dros 55 oed.
Bydd y cartrefi newydd hyn yn bodloni ac yn rhagori ar y safonau rheoleiddio presennol: Safon Ansawdd Tai Llywodraeth Cymru, Gofynion Ansawdd Datblygu Llywodraeth Cymru a Safonau Mannau a Chartrefi Prydferth Llywodraeth Cymru.
I gael rhagor o wybodaeth am y datblygiad, ewch i: Cartrefi Newydd i Deuluoedd yn Builder Street, Llandudno – Clwydalyn
