Adroddiad Amgylcheddol, Cymdeithasol a Llywodraethu ClwydAlyn yn dangos gwelliannau perfformiad pwysig

Cyhoeddodd un o Landlordiaid Cymdeithasol Cofrestredig mwyaf Gogledd Cymru ei Adroddiad Amgylcheddol, Cymdeithasol a Llywodraethu newydd ar gyfer 2025-2026. Mae’r adroddiad yn cynnig darlun clir o welliannau perfformiad allweddol y sefydliad.

Mae ClwydAlyn yn landlord cymdeithasol gyda phencadlys yn Llanelwy, ac mae’n darparu tua 6,800 o gartrefi cynnes a diogel ar draws saith sir yng ngogledd a chanolbarth Cymru. Mae adroddiad Amgylcheddol, Cymdeithasol a Llywodraethu newydd y sefydliad yn dangos cynnydd mesuradwy, yn benodol o ran y perfformiad ym meysydd amgylcheddol, cymdeithasol a llywodraethu.

Mae’r adroddiad blynyddol yn edrych ar feysydd sy’n bwysig iawn i breswylwyr, cymunedau, staff a rhanddeiliaid; o ansawdd ac effeithlonrwydd cartrefi i lesiant preswylwyr a staff, buddsoddiad yn y gymuned, a llywodraethu da.

Mae’r Adroddiad yn cyfuno tystiolaeth, sylwadau, ffeithiau, ystadegau ac astudiaethau achos i ddangos sut mae ClwydAlyn yn cyflawni ei flaenoriaethau, a gafodd eu nodi yn lansiad ei Gynllun Corfforaethol yn 2025. Mae pob un o’r blaenoriaethau hyn yn canolbwyntio ar yr uchelgais gyffredinol i weithio mewn partneriaeth i roi diwedd ar dlodi.

Mae’r blaenoriaethau hyn yn cynnwys:

Sicrhau bod preswylwyr a staff yn byw mewn cartrefi diogel a chynnes
Gweithio gyda phartneriaid i ddarparu mynediad at fwyd da, fforddiadwy
Cyfrannu at roi diwedd ar ddigartrefedd yn y rhanbarth

Mae prif feysydd yr adroddiad yn cynnwys:

Cynaliadwyedd
Effeithlonrwydd cartrefi
Lleihau carbon
Rheoli adnoddau
Atal lleithder a llwydni
Diogelwch ac ansawdd adeiladau
Llais a dylanwad preswylwyr
Cwynion
Addysg a sgiliau
Rheoli risg
Cydraddoldeb, amrywiaeth a chynhwysiant
Sicrwydd
Buddsoddiad parhaus
Llesiant

“Mae ein hadroddiad Amgylcheddol, Cymdeithasol a Llywodraethu yn helpu i ddod â’n cyfrifoldebau sefydliadol yn fyw drwy ddangos sut mae ein blaenoriaethau yn ymestyn y tu hwnt i frics a mortar ein cartrefi. Y tu ôl i’r ffeithiau a’r ffigurau, mae preswylwyr, cartrefi a chymunedau; dyma’r pethau pwysicaf.

"Mae ein cynnydd parhaus wrth gwrdd â’n targedau amgylcheddol, cymdeithasol a llywodraethu yn arwydd o’n hymrwymiad i gefnogi ein preswylwyr a staff i fyw’n dda, darparu cartrefi diogel, cynnes a fforddiadwy, lleihau effaith amgylcheddol ein hadeiladau newydd a’n prosiectau ôl-osod a sicrhau bod gan breswylwyr a rhanddeiliaid ClwydAlyn lais yn y penderfyniadau sy’n effeithio arnyn nhw.”

Clare Budden

Prif Swyddog Gweithredol ClwydAlyn

Mae adroddiad Amgylcheddol, Cymdeithasol a Llywodraethu ClwydAlyn bellach ar gael i’w ddarllen:

https://www.clwydalyn.co.uk/wp-content/uploads/2026/08/ClwydAlyn_ESG_25-26_wel_digi-final.pdf

YSTADEGAU A FFEITHIAU ALLWEDDOL O ADRODDIAD AMGYLCHEDDOL, CYMDEITHASOL A LLYWODRAETHU CLWYDALYN 2025/26:

Buddsoddwyd £3.25 miliwn ar fesurau ôl-osod
Croesawyd 838 o breswylwyr newydd
Gosodwyd 168 o baneli solar
Ailgylchwyd 99% o wastraff swyddfeydd
Adeiladwyd 100% o gartrefi newydd gan brif gontractwyr o ogledd Cymru
Roedd 98.4% o breswylwyr yn fodlon gyda’u gwaith trwsio
Hwyluswyd Cymorth Hawliau Lles i 369 o breswylwyr
Sicrhawyd £1.6 miliwn o enillion ariannol i breswylwyr
Darparwyd cymorth i 240 o breswylwyr mewn digwyddiadau a gweithgareddau cymunedol
Cymerodd 125 o breswylwyr ran mewn rhaglen beilot cynhwysiant digidol