"Dyma’r lle gorau i mi fyw erioed" Preswyliwr bodlon yn symud i’w chartref newydd yn Hen Bentre Pwylaidd, Gwynedd

Mae’r preswylwyr wrth eu boddau yn symud i’w cartrefi newydd fel rhan o gynllun Cam Un, Hen Bentre Pwylaidd, Gwynedd. Datblygwyd y cynllun byw’n annibynnol arloesol i breswylwyr oedrannus dros 55 oed gan y darparwr tai cymdeithasol ClwydAlyn, mewn partneriaeth â Chyngor Gwynedd, Bwrdd Iechyd Prifysgol Betsi Cadwaladr, Llywodraeth Cymru a Williams Homes (Bala) Ltd.

Mae’r preswyliwr Jennifer Evans wedi symud i’w chartref newydd sy’n rhan o gam cyntaf ailddatblygiad Hen Bentre Pwylaidd gan ClwydAlyn. Disgrifiodd ei byngalo newydd fel ‘breuddwyd sydd wedi dod yn wir’, wrth i’r preswylwyr ddechrau ymgartrefu yn y gymuned gofal ychwanegol.

Mae’r garreg filltir hon yn nodi cwblhau cam cyntaf y gwaith o ailddatblygu’r gymuned boblogaidd hon ym Mhen Llŷn, gan ddarparu cartrefi gofal ychwanegol a fydd yn helpu pobl hŷn i fyw’n annibynnol am gyfnod hwy, tra’n cadw mewn cysylltiad â’u ffrindiau, cymdogion a gwasanaethau cymorth.

Dywedodd Jennifer Evans, a oedd yn arfer byw yn y tai gwreiddiol ym Mhentref Pwylaidd Penrhos: “Roeddwn i’n hapus iawn yn byw yn yr hen adeiladau ond ar ôl dod yna, mae fel breuddwyd sydd wedi dod yn wir. Dydw i erioed wedi cael byngalo cystal, a hoffwn longyfarch yr adeiladwyr. Dw i’n hapus iawn yma. Mae gen i ardd fawr, cegin, dwy lofft a phopeth mae ei angen arnaf. Dyma’r lle gorau i mi fyw erioed.”

Cartrefi Newydd yn Hen Bentre Pwylaidd

Dyluniwyd y cartrefi newydd yn benodol ar gyfer pobl hŷn sydd ag angen gofal a chymorth wedi’i asesu, ac maent yn cyfuno annibyniaeth a theimlad o sicrwydd.

“Mae digon o le yn y cartrrefi newydd hyn, maen nhw’n hygyrch ac wedi’u dylunio’n dda, gyda cheginau modern, ystafelloedd ymolchi cyfoes a gosodiadau ymarferol sy’n helpu preswylwyr i fyw’n gysurus ac yn annibynnol wrth iddyn nhw heneiddio. Ac yn bwysicaf oll, maen nhw’n rhoi cyfle i breswylwyr fod yn rhan o’r gymuned arbennig hon.
“Rydyn ni wrth ein bodd i weld ymateb cadarnhaol y preswylwyr sy’n symud i fyw i Gam Un y cynllun ac rydyn ni’n dymuno pob hapusrwydd iddynt yn eu cartrefi newydd.”

Penny Storr

Pennaeth Datblygu

Cynhesrwydd, Cysur a Fforddiadwyedd

Wedi’u hadeiladu i safonau effeithlonrwydd ynni modern, EPC A, mae’r byngalos yn gynnes, yn gysurus ac yn fforddiadwy i’w cynnal. Bydd lefelau uchel o inswleiddio, systemau gwresogi effeithlon a dulliau adeiladu cynaliadwy yn lleihau’r defnydd o ynni a’r costau rhedeg, gan olygu y bydd y preswylwyr yn fwy cysurus a’u biliau tanwydd yn is o bosibl.

Pwysigrwydd Cymuned a Llesiant

Gall preswylwyr hefyd fwynhau bod yn rhan o gymuned groesawgar a chefnogol sefydledig. Mae’r cyfleusterau ac ardaloedd cyffredin yn annog rhyngweithio cymdeithasol, gan helpu’r preswylwyr i wneud ffrindiau, a’u hannog i gymryd rhan mewn gweithgareddau a chadw mewn cysylltiad ag eraill. I lawer, mae’r teimlad hwn o berthyn yn hollbwysig i gynnal llesiant corfforol ac emosiynol.

O’r chwith i’r dde: Lisa Jones, Swyddog Cyswllt Tai ClwydAlyn, yn croesawu’r preswyliwr Jennifer Evans i’w chartref newydd yn Hen Bentre Pwylaidd.

Mwy na Chartref yn unig

Mae Hen Bentre Pwylaidd yn cynnig llawer mwy na chartrefi o ansawdd uchel. Gall y preswylwyr hefyd fanteisio ar bob math o gyfleusterau ar y safle sydd wedi’u darparu i annog ffordd o fyw weithgar a chymdeithasol. Mae’r rhain yn cynnwys ardaloedd cyffredin, cyfle i fwynhau pryd dyddiol gyda ffrindiau a chymdogion, ardaloedd awyr agored a mynediad i wasanaethau cymorth pan fo’r angen.

Manteision y Lleoliad

Saif Hen Bentref Pwylaidd mewn lleoliad bendigedig ym Mhen Llŷn, ac mae’r datblygiad newydd yn rhoi cyfle i bobl hŷn aros yn agos at eu teuluoedd, ffrindiau a chymunedau lleol. Gall preswylwyr ddal i fwynhau’r ardal maent yn ei hadnabod, tra’n elwa ar gartrefi sy’n addas i’w dyfodol.

Dywedodd Penny Lofts, Rheolwr Tir a Chaffael Williams Homes (Bala) Ltd: “Mae’r cynllun adeiladu hwn wedi bod yn un gwahanol iawn i ni, oherwydd dydyn ni ddim yn aml yn gweithio ar ddatblygiad lle mae’r darpar breswylwyr yn chwarae rhan mor bwysig yn yr eiddo sy’n cael eu datblygu. Mae’n bleser gweld y preswylwyr yn symud i mewn ac yn mwynhau eu cartrefi newydd.”

Gweledigaeth i’r Dyfodol

Mae gweld y preswylwyr cyntaf yn symud i’r cartrefi newydd yn Hen Bentre Pwylaidd yn garreg filltir bwysig yn ailddatblygiad ehangach y cynllun. Bydd cynlluniau yn parhau i drawsnewid y safle fesul cam, i greu cymuned fodern sy’n cyfuno tai o ansawdd uchel, cymorth iechyd a llesiant, cynaliadwyedd a chyfleoedd i breswylwyr fwynhau eu bywyd wrth heneiddio yn hyderus ac yn annibynnol.

“Mae sicrhau bod pobl leol yn gallu cael gafael ar y dewisiadau gofal a thai maen nhw’n eu haeddu heb orfod symud i ffwrdd o’u teuluoedd a’r ardal lle maen nhw wedi byw ar hyd eu hoes yn flaenoriaeth i’r Cyngor, felly hoffwn longyfarch yr holl bartneriaid ar y cydweithio gwych sydd wedi ein galluogi i gyrraedd y garreg filltir bwysig hon. Rwy’n falch iawn o weld cynnydd yn cael ei wneud er budd cymunedau’r ardal.”

Cynghorydd Dilwyn Morgan

Aelod Cabinet Oedolion, Iechyd a Llesiant Cyngor Gwynedd a Chadeirydd Bwrdd Prosiect Partneriaeth Penrhos

“Mae’n wych gweld y preswylwyr yn ymgartrefu ar safle Hen Bentre Pwylaidd ym Mhen Llŷn, a chlywed adborth mor gadarnhaol gan y rhai sy’n byw yno.
“Mae’r argyfwng tai yn dal i roi pwysau ar gymunedau ledled Gwynedd a thrwy weithio mewn partneriaeth agos â chymdeithasau tai fel ClwydAlyn, gallwn ddarparu cartrefi fforddiadwy, modern ac ynni-effeithlon y mae eu hangen ar frys ar bobl Gwynedd.
“Rwy’n edrych ymlaen i weld cam nesaf y datblygiad a rhagor o gartrefi yn cael eu datblygu ar gyfer y gymuned leol.”

Cynghorydd Paul Rowlinson

Aelod Cabinet Tai ac Eiddo Cyngor Gwynedd

Bydd y fflatiau ar y safle ar gael cyn bo hir. I gael rhagor o wybodaeth, neu i drefnu ymweliad, ewch i: Hen Bentre Pwylaidd, Gwynedd – Clwydalyn